Xəbərlər

Azərbaycan qazını Avropaya nəql edəcək Trans-Adriatik (TAP) qaz kəməri layihəsi konsorsiumu boru xəttinin quru və dənizdə tikintisi, kompressor stansiyaları və giriş terminalı ilə yanaşı, polad borularla təminatına dair mühəndislik və tikinti xidmətlərinin satınalınma prosesinə yenidən başlayıb.

ERtv APA-ya istinadən xəbər verir ki, bu, konsorsiumun yaydığı açıqlamada bildirilib.

Qeyd edək ki, TAP layihəsi Xəzər dənizinin Azərbaycan sektorundakı «Şahdəniz» yatağının işlənməsi layihəsinin ikinci fazası çərçivəsində hasil olunacaq təbii qazın Avropaya nəql edilməsini nəzərdə tutur. Boru kəmərinin uzunluğu təxminən 870 km-dir.

Kəmər Yunanıstan, Albaniya və Adriatik dənizini keçərək İtaliyaya çıxışı təmin edəcək. TAP-ın səhmdarları BP (20%), ARDNŞ (20%), “Statoil” (20%), “Fluxys” (16%), “Total” (10%), “E.ON” (9%) və “Axpo” (5%) şirkətləridir.