Xəbərlər

Dövlət Neft Şirkəti bu ilin yanvar-mart aylarında büdcəyə 523 milyon 106 min manat vəsait ödəyib.

ERtv şirkətə istinadən xəbər verir ki, bu göstərici 2013-ci ilin müvafiq dövrü ilə müqayisədə 137 milyon 114 min manat və ya 35,5 faiz çox olub.

Birinci rübdə büdcəyə ödənilən vəsaitin 176 milyon 493 min manatı mart ayının payına düşüb.

Bu göstərici ötən ilin mart ayına nisbətən 57 milyon 17 min manat və ya 47,7 faiz çox olub.

Bundan əlavə, şirkət tərəfindən birinci rübdə Dövlət Sosial Müdafiə Fonduna ödəniş 37 milyon 38 min manat təşkil edib ki, bu da ötən ilin yanvar-mart aylarına nisbətən 49 min manat və ya 0,1 faiz çox olub.

Mart ayında isə şirkət Dövlət Sosial Müdafiə Fonduna 12 milyon 218 min manat vəsait köçürüb.