Xəbərlər

Tbilisidə müxalifət mitinqinin dağıdılmasının 25-ci ildönümünə həsr olunmuş nümayiş insidentsiz ötüşməyib.

Abidə önünə qoyulan əklillərdən birinin üzərindəki ağ-göy-qırmızı rəngli bayraq nümayiş iştirakçılarını qıcıqlandırıb.

Lenti Rusiya bayrağı bilən nümayişçilər onu tapdalayaraq yandırıblar. Sonradan məlum olub ki, əklil Slovakiya nümayəndə heyəti tərəfindən qoyulub.

ERtv gürcü mətbuatına istinadən xəbər verir ki, rəsmi Tbilisi Slovakiya nümayəndə heyətinə Gürcüstan tarixinə göstərdiyi hörmətə görə rəsmi olaraq minnətdarlığını bildirib və lentlə bağlı insidenti pisləyərək hadisənin “düşünülmədən” baş verdiyini ifadə edib.

Hadisədə müqəssir olan Tbilisinin Samqorski rayon administrasiyası rəhbərinin müavini Beso Qazdeliani üzr istəməkdən imtina edib.

Xatırladaq ki, 25 il əvvəl Tbilisidə səhər saat 4:00 radələrində Rustaveli prospektində parlament binası qarşısında Sovet İttifaqının xüsusi təyinatlı dəstələri və daxili qoşunlar çoxsaylı mitinq iştirakçılarına qarşı güc tətbiq ediblər. Mitinqə toplaşanlar Gürcüstanın dövlət müstəqilliyinin bərpasını və onun Sovet İttifaqı tərkibindən çıxmasını tələb edirdilər.