Xəbərlər

Azərbaycanda “Novruz 2014 - Beynəlxalq Gənclər Festivalı” keçirilir.

ERtv xəbər verir ki, festival Gənclər və İdman Nazirliyinin dəstəyi,  “Avropa Tələbələr Forumu-Bakı” İctimai Birliyinin (AEGEE-Bakı) təşkilatçılığı ilə baş tutub.

Festival 19-25 mart tarixlərini əhatə edəcək. Festivalda dünyanın 35 ölkəsini təmsil edən 50 nəfər əcnəbi gənc iştirak edəcək. Festivalın keçirilməsində əsas məqsəd Azərbaycan mədəniyyətinin, milli adət-ənənələrinin dünyaya təbliğidir. Tədbir müddətində Azərbaycana dəvət olunan əcnəbi gənclər novruz adət-ənənələri ilə tanış olacaq, bir neçə regiona səfər edəcəklər. Qonaqların həmçinin bir sıra tarixi memarlıq abidələrinə ekskursiyası təşkil olunacaq.

Qeyd edək ki, festival hər il ənənəvi olaraq AEGEE-Bakı tərəfindən təşkil olunur. AEGEE-Bakı Avropanın 40-dan artıq ölkəsində 200-dən artıq şəhərində fəaliyyət göstərən və özündə 20 mindən çox tələbəni birləşdirən Avropa Tələbələr Forumu (AEGEE) təşkilatının Bakı şəhəri üzrə yerli nümayəndəliyidir. Təşkilatın əsas vəzifəsi Azərbaycan tələbələri ilə Avropa tələbələri arasında ünsiyyət məkanı yaratmaq, gənclər arasında Avropa dəyərlərini təşviq etməkdir.