Xəbərlər

Türkiyənin Kanal 7 və Ülke TV telekanallarında nümayiş olunan “İskele Sancak” proqramında çıxış edən Türkiyənin Baş naziri Rəcəb Tayyib Ərdoğan Krımdakı vəziyyət haqqında jurnalistlərin suallarını cavablandırıb.

ERtv Haberler.com-a istinadən xəbər verir ki, çıxışı zamanı baş nazir bildirib:

“Biz hər bir halda Krım Muxtar Respublikasının yanındayıq. Muxtar Respublika vətəndaşlarının hüquqlarının təminatı üçün Rusiya ilə danışıqlar aparılır. Düşünürəm ki, gün ərzində Almaniya kansleri Angela Merkel ilə görüş baş tutacaq. O, özü də bu istəyi ifadə edib”.

Ərdoğan çıxışı zamanı əlavə edib ki, məsələ ilə əlaqədar Azərbaycan və Qazaxıstan rəhbərliyi ilə də görüşlər olacaq.

“Azərbaycan və Qazaxıstan rəhbərliyi ilə də görüşlərim olacaq. Bununla yanaşı, Ukrayna və Krım Muxtar Respublikasındakı vəziyyətlə əlaqədar Rusiya ilə danışıqlarda nəticə əldə olunması üzrə səylərin aktivləşdirilməsini istərdim” – Ərdoğan deyib.

“Hazırkı vəziyyət həqiqətən də, Krımda yaşayan qardaşlarımız üçün ürəkaçan deyil. Bununla əlaqədar Krım tatarlarının lideri Mustafa Cəmillə danışıqlar aparılıb.

Daha əvvəl xarici işlər naziri Ə.Davudoğlu Ukraynaya gedərək həm Ukraynanın mərkəzi hakimiyyəti, həm də Krım Xalq Respublikasının rəhbərliyi ilə görüşlər keçirib. Bu görüşlərdən sonra təbii ki, nə isə əldə etmişik” - deyən baş nazir çıxışında ABŞ Dövlət katibi Con Kerri və Rusiya xarici işlər naziri Sergey Lavrovla İtaliyada olan görüşlərini də xatırladıb.