Xəbərlər

Azərbaycan Dövlət Neft Şirkətinin Türkiyənin Əliağa ərazisində yerləşən “Star” Neft Emalı Zavodunun tikintisinin maliyyələşməsi üçün həm kommersiya bankları, həm EXİM banklar (idxal-ixrac bankları), həm də digər kommersiya tərəfləri ilə danışıqları yekunlaşır.

ERtv xəbər verir ki, bu barədə Dövlət Neft Şirkətinin iqtisadi məsələlər üzrə vitse-prezidentiSüleyman Qasımov jurnalistlərə açıqlamasında bildirib.

O qeyd edib ki, banklar tərəfindən iştirak məktubları martın 31-də bitir.

“O vaxta qədər çalışırıq ki, bütün əməliyyatları yekunlaşdıraq. Hər hansı bir səbəbdən kənarlaşma və çatışmazlıq olarsa, bunun qarşısını almaq üçün banklarla sıx əlaqə aparılır.

Hətta bankların verdikləri məktubların vaxtının bir az uzadılması istiqamətində danışıqlar aparılır. Bu böyük prosesdir” - deyə, S.Qasımov əlavə edib.

Qeyd edək ki, “Star” Neft Emalı Zavodunun təməli 2011-ci il oktyabrın 25-də Azərbaycan Prezidenti İlham Əliyev və Türkiyənin Baş naziri Rəcəb Tayyib Ərdoğanın iştirakı ilə qoyulub.

İldə 10 milyon ton istehsal gücünə malik olacaq “Star” zavodunda “Ural”, “Azəri Light” və “Kərkük” kimi neft markaları emal ediləcək.

“Star” Neft Emalı Zavoduna təxminən 5-6 milyard dollarlıq sərmayə yatırılması gözlənilir.