Xəbərlər

Avropa bir neçə ölkədən qaz alır,kömürdən istifadə edir, özünün alternativ enerji mənbələri var.

Amma Azərbaycanın Avropaya satacağı qaz ən təmiz və ən ucuzdur.

ERtv xəbər verir ki, bu barədə Dövlət Neft Şirkətinin vitse-prezidentinin müavini Vitali Bəylərbəyov Azərbaycan İnvestisiya Sammitində çıxışında bildirib.

SOCAR rəsmisi qeyd edib ki, “Şahdəniz” yatağının ikinci mərhələsindən hasil olunan qazın Avropaya ixracı üçün uzunmüddətli və sabit əlaqələr qurulmaqdadır.

“Şahdəniz 2 layihəsi dünyada son zamanlarda həyata keçirilən ən böyük qaz layihəsidir. Bu layihə çərçivəsində Avropanın müxtəlif ölkələrindən olan 11 şirkətlə 25 il müddətinə müqavilələr imzalanıb”, - o, çıxışında əlavə edib.

Tədbirdə çıxış edən “bp-Azerbaijan” şirkətinin vitse-prezidenti Hüseyn Məmmədov bildirib ki, şirkət regionda fəaliyyətini uzun müddət davam etdirmək istəyir.

O, Şahdəniz layihəsindən danışaraq qeyd edib ki, Şahdəniz yatağının birinci mərhələsi üzrə qaz hasilatı müvəffəqiyyətlə həyata keçirilir, yeni texnologiyalardan istifadə olunur.

“İkinci mərhələnin işlənməsində də yeni texnologiyalardan istifadə olunacaq, ölkəyə yeni texnologiya və təcrübə gətiriləcək”, -, H.Məmmədov əlavə edib.