Xəbərlər

Fevralın 21-də YUNESKO-nun xoşməramlı səfiri Marianna V. Vardinoyannisin dəvəti ilə Yunanıstanın ən önəmli mədəniyyət mərkəzi sayılan Akropolis Muzeyində Nizami Gəncəvi Beynəlxalq Mərkəzi İdarə Heyətinin V toplantısı keçirilib.

ERtv-yə Diasporla İş üzrə Dövlət Komitəsindən bildiriblər ki, toplantını açan Marianna V.Vardinoyannis bildirib ki, Nizami Gəncəvi Beynəlxalq Mərkəzi kimi nüfuzlu bir təşkilatın İdarə Heyəti toplantısının Yunanıstanda keçirilməsi çox önəmli hadisədir və bunun davamlı olacağına ümid edir.

Tədbirdə Mərkəzin gələcək fəaliyyəti və statusunun müəyyənləşdirilməsi, o cümlədən katibliyinin genişləndirilməsi və mərkəzi ofisin işini daha da təkmilləşdirilməsi ilə bağlı geniş müzakirələr aparılıb.

Eyni zamanda Azərbaycan Prezidenti tərəfindən Mərkəzin fəaliyyətinə göstərilən diqqət və qayğı xüsusi vurğulanıb, həmçinin əldə olunmuş nailiyyətlərdə bu dəstəyin əsas rol oynadığı qeyd olunub.

Toplantının işində Latviyanın sabiq prezidenti, Nizami Gəncəvi Beynəlxalq Mərkəzinin həmsədri və Madrid Klubunun prezidenti xanım Vaira Vike-Freiberga, İsgəndəriyyə Kitabxanasının direktoru, Nizami Gəncəvi Beynəlxalq Mərkəzinin həmsədri İsmail Serageldin, YUNESKO-nun xoşməramlı səfiri Marianna V.Vardinoyannis, Rumınyanın sabiq prezidenti Emil Constantinescu, Bolqarıstanın sabiq prezidenti Petar Stoyanov, YUNESKO-nun Broadband Komissarı Valter Füst, Gürcüstan Universiteti Qəyyumlar Şurasının sədri Giuli Alasaniya, MENTOR fondunun İcraçı direktoru Farida Allaghi iştirak edib.