Xəbərlər

Zaqatala rayonunda ötən il sahibkarlığın inkişafına dövlət dəstəyi daha da gücləndirilib, iqtisadiyyatın müxtəlif sahələri üzrə sahibkarlara güzəştli kreditlər verilib.

Rayon statistika idarəsindən ERtv-yə verilən məlumata əsasən, Sahibkarlığa Kömək Milli Fondunun vəsaiti hesabına 12 sahibkara 0,59 ha torpaq sahəsi satılıb, alkoqollu içkilərin və tütün məmulatlarının satışı üçün 60 ədəd lisenziya, 14 sahibkarlıq obyektinin layihələndirilməsinə və 14 sahibkarlıq obyektinin tikintisinə sərəncam verilib.

Şəki-Zaqatala iqtisadi rayonu üzrə Zaqatala rayonunda “Sahibkarlığın inkişafına dövlət dəstəyi” mövzusunda tədbir keçirilmiş, tədbirdə müasir heyvandarlıq kompleksinin, çayçılıq, taxılçılıq və tütünçülük təsərrüfatlarının yaradılması üzrə hazırlanmış nümunəvi investisiya layihələrin təqdimatı, sahibkarlıq subyektlərinə güzəştli kreditlərin verilməsi təmin edilib.

Rayonda sahibkarlıq subyektlərinə səmərəli maliyyə dəstəyinin göstərilməsi mexanizmi formalaşdırılıb. Son bir ildə rayonda fəaliyyət göstərən 8 bank filialı və 3 qeyri-bank kredit təşkilatları tərəfindən əhaliyə və iş adamlarına ümumilikdə 43,1 milyon manat həcmində kreditlərin verilməsi təmin edilib ki, bu da 2012-ci ilin göstəricisindən 10,8 faiz çoxdur.