Xəbərlər

Əməkdar artist Fərqanə Qasımovanın “Yalnız ona doğru” adlı diskinin təqdimatı keçirilib.

ERtv xəbər verir ki, tədbirdə Bəstəkarlar Birliyinin sədri, xalq artisti Firəngiz Əlizadə, professor, xalq artisti Siyavuş Kərimi, xalq yazıçısı Anar, əməkdar incəsənət xadimi Əbdül Mahmudov, bəstəkar Nailə Mirməmmədli, şoumen Murad Dadaşov, xalq artisti Ağaxan Abdullayev və başqa mədəniyyət, ədəbiyyat və incəsənət nümayəndələri iştirak edib.

Gecənin aparıcısı Nərgiz Cəlilova olub. Aparıcı mərasim iştirakçılarını salamlayıb. Bildirib ki, albomda xanəndənin iki il ərzində ifa etdiyi musiqi nümunələri yer alıb.

Daha sonra isə xalq artisti Alim Qasımov çıxış edib. Fərqanənin yeni solo albomunun yüksək səviyyədə hazırlandığını diqqətə çatdıraraq, ifalardan razı qaldığını dilə gətirib.

Xalq artisti Siyavuş Kərimi Fərqanə Qasımovanın sənəti, ifaçılıq məharəti haqqında fikirlərini tədbir iştirakçıları ilə bölüşüb.

Daha sonra söz alan Fərqanə Qasımova bildirib ki, “Yalnız ona doğru” albomunda 11 mahnı yer alıb:

“Onlardan ikisi ustadım və atam Alim Qasımovla duetdir. Alboma Cahangir Cahangirovun, Oqtay Kazımovun, Ramiz Mirişlinin mahnıları ilə yanaşı, Alim Qasımovun müəllifi olduğu bir, mənim müəllifim olduğum iki bəstə daxildir”.