Xəbərlər

Qax rayonunda Yaponiya hökumətinin “Ot kökləri və insan təhlükəsizliyi qrant yardımı Proqramı” çərçivəsində həyata keçirilən “Tullantıların idarə olunması” layihəsi üzrə işlər davam etdirilir.

ERtv-nin bölgə müxbirinə Rayon İcra hakimiyyətindən bildirilib ki, layihənin icrası Yaponiyanın ölkəmizdəki səfirliyi ilə Azərbaycan İcma İnkişafı, Tədqiqat, Təlim və Resurs Mərkəzi arasında ötən ilin oktyabrında bağlanmış qrant müqaviləsi əsasında həyata keçirilir.

Ekologiya sahəsi ilə bağlı olan bu layihənin əsas məqsədi Qax rayonunda tullantıların və təkrar istifadənin davamlı şəkildə idarə olunmasını təmin etməkdir.

Bu məqsədlə Qax şəhərindən bir neçə kilometr aralıda emal müəssisəsi yaradılır.

Burada məişət tullantılarının çeşidlənməsi üçün bunkerlər, həmçinin ekologiya üçün təhlükəli olan tullantıların yandırılaraq zərərsizləşdirilməsi məqsədilə yanma kameraları inşa edilir. Müəssisədə eyni vaxtda 30 tonadək məişət tullantısını emal etmək mümkün olacaqdır.

Layihə üzrə işlərin bu il martın sonunadək başa çatdırılması nəzərdə tutulur.