Xəbərlər

ABŞ-ın dövlət borcu rekord həddi keçərək 17 trilyon dollara çatıb. Bunun 1,317 trilyon dolları Çinə olan borclardır.

ERtv AzərTAc-a istinadla xəbər verir ki, son illər Çin dünya iqtisadiyyatının artımında iştirak edən əsas ölkələrdən biridir. Birləşmiş Ştatların bu ölkəyə yaranan küllü miqdarda borcu ilə bir vaxtda Çin Xalq Respublikasının qızıl-valyuta ehtiyatlarının da həcmi artaraq rekord həddə - 3,82 trilyon dollara çatıb.

Bu artıma əsas səbəb kimi yuanın kursunun dollara nisbətdə möhkəmlənməsi, xarici bazarda sərmayəçilərin cəlb olunmasının nisbətən asanlaşması göstərilir.

İTAR TASS xəbər verir ki, ABŞ Maliyyə Nazirliyinin hesablamalarına görə, ölkənin ikinci ən böyük xarici kreditoru borc aktivlərini 1,186 trilyon dollara qədər artıran Yaponiyadır.
Ötən çərşənbə günü Vaşinqtonun Heritage Foundation tədqiqat mərkəzi və Wall Street Journal qəzeti azad iqtisadiyyatı olan ölkələrin reytinq cədvəlini dərc edib. Bu cədvələ əsasən ABŞ birinci dəfə olaraq ilk onluqdan çıxaraq yalnız 12-ci yerdə qərarlaşa bilib.