Xəbərlər

Ermənistan yanvarın 27-də öz işinə başlayacaq Avropa Şurası Parlament Assambleyasının (AŞPA) qış sessiyası zamanı diqqət mərkəzində olacaq.

ERtv xəbər verir ki, bu barədə Ermənistanın Epress.am saytı “Aykakan jamanak” qəzetinə istinadən yazıb.

Qeyd edilib ki, oktyabrın 2-də Ermənistan prezidenti Serj Sarkisyanın AŞPA-da çıxışı zamanı bu ölkənin nümayəndə heyətinin üzvü Zauri Postancyan ona kazinoda 70 milyon dollar uduzması ilə bağlı sual ünvanlayıb. Daha sonra Ermənistan parlamentinin sədri Ovik Abramyan AŞPA nümayəndə heyətinin tərkibində dəyişiklik edərək Postancyanı tərkibdən çıxarıb.

Postancyan bundan sonra üzvü olduğu Avropa Xalq Partiyası fraksiyasının dəvəti əsasında Strasburqa gedərək, burada avropalı deputatlarla danışıqlar aparıb.

O, nəşrə açıqlamasında deyib ki, AŞPA Ermənistan nümayəndə heyətinin legitimliyindən şikayət edə bilər.

“Bizim məlumatımıza görə, Zauri Postancyan AŞPA-da onlarla deputatla danışıb və onları iclasın əvvəlində Ermənistanın nümayəndə heyətinin legitimliyi məsələsini qaldırmağa razı sala bilib. Kifayət qədər qızğın müzakirələrin gedəcəyi gözlənilir”, - deyə vurğulanıb.