Xəbərlər

Türkiyənin xarici işlər naziri Əhməd Davudoğlu İstanbuldakı “Çırağan” sarayında iranlı həmkarı Məhəmməd Cavad Zərif ilə keçirdiyi mətbuat konfransında bildirmişdir ki, cari ilin martında Türkiyə, Azərbaycan və İran xarici siyasət idarələri rəhbərlərinin növbəti görüşü keçirilə bilər.

ERtv AzərTAc-a istinadən xəbər verir ki, Ə.Davudoğlu demişdir ki, fevral ayında İran Prezidenti Həsən Ruhaninin Ankaraya səfəri zamanı iki ölkə arasında Yüksək Səviyyəli Əməkdaşlıq Şurasının yaradılması da planlaşdırılır.

Türkiyənin Baş naziri Rəcəb Tayyib Ərdoğanın da yanvarın sonunda Tehrana səfər edəcəyini bildirən Ə.Davudoğlu vurğulamışdır ki, iki ölkə arasında əlaqələrin gücləndirilməsi üçün səylər artırılacaqdır. O, əlavə etmişdir ki, ötən il həcmi azalan ticarət dövriyyəsinin 2015-ci ildə 30 milyard dollara çatdırılması planlaşdırılır.

Nazirlər bildirmişlər ki, ikitərəfli əlaqələrlə yanaşı, tərəflər regional məsələlər ətrafında da geniş fikir mübadiləsi aparmışlar.