Xəbərlər

2013-cü il dekabrın 27-də Azərbaycan Respublikasının İsveçrə Konfederasiyasındakı Səfirliyi və ARDNŞ-nin İsveçrə nümayəndəliyinin birgə təşkilatçılığı ilə Bern şəhərində 31 Dekabr- Dünya Azərbaycanlılarının Həmrəyliyi Günü və Yeni il münasibətilə bayram tədbiri keçirilib.

ERtv  xəbər verir ki, tədbiri giriş sözü ilə açan səfir Əkrəm Zeynallı Ümummilli Lider Heydər Əliyevin təşəbbüsü ilə təsis edilmiş bu bayramı xalqımızın birlik və mütəşəkkilliyi, milli təəssübkeşliyi və vətənə sədaqətinin rəmzi kimi səciyyələndirmiş, artıq uzun illərdir ki, təntənəli şəkildə qeyd edilən Həmrəylik Gününün xarici ölkələrdə yaşayan soydaşlarımızda müstəqil Azərbaycan dövlətinə məhəbbət hissini aşıladığını diqqətə çatdırmışdır.

Azərbaycan Respublikasının Prezidenti cənab İlham Əliyevin Dünya Azərbaycanlılarına ünvanladığı təbrikinin mətnini tədbir iştirakçılarının diqqətinə çatdıran səfir Ə.Zeynallı, ölkə başçısının müstəqil Azərbaycan Respublikasının qorunması və inkişaf etdirilməsi, dünya birliyində mövqelərinin möhkəmləndirilməsi işində diasporamızın üzərinə düşən vəzifələrlə bağlı fikirlərinin xaricdə yaşayan soydaşlarımızı fəaliyyətlərini daha da artırmağa ruhlandırdığını bildirmişdir.

Dünya Azərbaycanlılarının Həmrəylik Günü və Yeni il münasibətilə İsveçrədəki soydaşlarımızı təbrik edən səfir, onları Azərbaycan Respublikasının maraqlarının qorunmasında həmrəylik nümayiş etdirməyə və bu ali amal ətrafında sıx birləşməyə çağırmışdır.

Tədbir Beynəlxalq Muğam Mərkəzinin solistləri xanəndələr Ehtiram Hüseynov və Vəfa Vəzirovanın konsert proqramı və rəsmi ziyafətlə davam etdirilmişdir.