Xəbərlər

Bu gün təhsil naziri Mikayıl Cabbarov kimya, riyaziyyat və rus dili üzrə 2013-cü ildə keçirilmiş beynəlxalq fənn olimpiadalarının qalibləri ilə görüşüb.

ERtv Təhsil Nazirliyinin saytına istinadən xəbər verir ki, beynəlxalq fənn olimpiadalarının qaliblərinin əldə etdikləri uğurlara görə təbrik edən nazir onların gələcəkdə daha böyük uğurlara nail olacağına və yüksək səviyyəli mütəxəssis kimi yetişəcəklərinə inandığını söyləyib.

Olimpiada qaliblərinin belə möhtəşəm nailiyyət əldə etməsində təhsil aldıqları məktəblərin və müəllimlərin mühüm rolunu qeyd edən M.Cabbarov, xüsusilə onların ailələrinə və valideynlərinə minnətdarlığını bildirib.

Beynəlxalq olimpiadaların qalibləri onlara göstərilən diqqətə görə təşəkkürlərini bildirib, təhsil aldıqları məktəblər və müəllimləri haqqında məlumat veriblər. Onlar beynəlxalq bilik yarışmalarında Azərbaycanı yüksək səviyyədə təmsil etməkdən qürur hissi keçirdiklərini söyləyiblər.

Görüşün sonunda beynəlxalq fənn olimpiadalarının qaliblərinə Təhsil Nazirliyi adından qiymətli hədiyyələr təqdim olunub.