Xəbərlər

Yanvar-oktyabr ayları ərzində bitkiçilik məhsulları istehsalı 3,8 faiz, heyvandarlıq məhsulları istehsalı 5,6 faiz, kənd təsərrüfatının ümumi məhsulu isə 4,7 faiz ötənilki səviyyədən yüksək olub.

ERtv-nin Dövlət Statistika Komitəsinə istinadən verdiyi xəbərə görə, aqrar bölmədə məhsul yığımı başa çatmaq üzrədir.

Noyabrın 1-nə kimi tarlalardan qarğıdalı ilə birlikdə 2938,8 min ton taxıl, 992,2 min ton kartof, 1191,1 min ton tərəvəz, 691,2 min ton meyvə və giləmeyvə, 429,7 min ton bostan məhsulları, 142,8 min ton üzüm, 3,3 min ton tütün, 87,0 min ton şəkər çuğunduru, 549,9 ton yaşıl çay yarpağı, 31,5 min ton pambıq toplanıb.

Ötən ilin müvafiq dövrü ilə müqayisədə dənli və dənli paxlalı istehsalı 4,9 faiz, kartof istehsalı 2,5 faiz, tərəvəz istehsalı 0,1 faiz, meyvə və giləmeyvə istehsalı 3,9 faiz, bostan məhsulları istehsalı 0,5 faiz, üzüm istehsalı 14,5 faiz artıb.

İlin əvvəlindən keçən vaxt ərzində diri çəkidə 402,7 min ton ət, 1528,9 min ton süd, 1160,2 milyon ədəd yumurta və 16,5 min ton yun istehsal olunub. 2012-ci ilin müvafiq dövrünə nisbətən ət istehsalı 4,0 faiz, süd istehsalı 6,4 faiz, yumurta istehsalı 16,3 faiz, yun istehsalı 2,3 faiz artıb.

Kənd əməkçiləri gələn ilin məhsulu üçün 792,3 min hektar sahədə şum qaldırıb, 444,8 min hektar sahədə dən üçün taxıl, o cümlədən 272,7 min hektar sahədə buğda, 172,1 min hektar sahədə arpa səpiblər.