Xəbərlər

Xəbər verdiyimiz kimi, noyabrın 20-dən 24-dək Nizami Kino Mərkəzində birinci Bakı Beynəlxalq turizm filmləri festivalı keçiriləcəkdir. Festivalın müsabiqə proqramına 31 ölkədən 78 film daxil edilmişdir.

ERtv Mədəniyyət və Turizm Nazirliyinin mətbuat xidmətinə istinadən xəbər verir ki, festival Azərbaycan və Fransanın birgə istehsalı olan “Qafqaza qayıdış” sənədli filminin təqdimatı ilə açılacaqdır.

Məşhur fransız aktyoru Jerar Depardye, illüstrasiyaçı rəssam Matyo Sapanla yanaşı, aktyor Ənvər Həsənov və tanınmış televiziya aparıcısı Fuad Axundovun da çəkildiyi filmin quruluşçu rejissorları Stefan Berqunyu, Jan-Pyer Devilerdir. Filmin ssenari müəllifləri Fuad Axundov, Stefan Berqunyu, Jan-Pyer Deviler, Lesli Qranberq, quruluşçu operatoru Stefan Byon, prodüserləri Arno Friley və Cavid İmamverdiyevdir.

Ekran əsərində 1858-ci ildə Qafqaza, o cümlədən Azərbaycana səyahət etmiş məşhur fransız yazıçısı və səyyahı Aleksandr Dümanın “Qafqaz” əsərində yazdıqları izah edilir, onun izi ilə Jerar Depardyenin Azərbaycana səyahətindən bəhs olunur. Filmdə J.Depardyenin vasitəsi ilə yazıçının niyə məhz bu məkandan təsirləndiyi və əsəri üçün necə ilham aldığı tamaşaçıya aydın olur. Aleksandr Düma kimi Jerar Depardye də səyahət zamanı maraqlı insanlara rast gəlir, bir-birindən gözəl yerləri kəşf edir.