Xəbərlər

Bu gün Bakıda Azərbaycan-İtaliya biznes forumu keçirilib.

ERtv xəbər verir ki, biznes forum çərçivəsində Azərbaycanda İxracın və İnvestisiyaların Təşviqi Fondu (AZPROMO) ilə İtaliya Müəssisələrinin Təşviqi və Beynəlləşdirilməsi Təşkilatı (İCE) arasında qarşılıqlı əməkdaşlıq haqqında Anlaşma Memorandumu imzalanıb.

Forumda rəsmi şəxslərlə yanaşı, hər iki tərəfdən sənaye, tikinti, konsaltinq, maliyyə, İKT, energetika, infrastruktur, memarlıq, hidroenergetika, dizayn və s. sahələrdə fəaliyyət göstərən 300-ə yaxın şirkət nümayəndəsi iştirak edib.

Forumda çıxış edən Azərbaycan iqtisadiyyat və sənaye nazirinin müavini Niyazi Səfərov bildirib ki, forumda 120 Azərbaycan şirkəti iştirak edir.

O, Azərbaycanla İtaliya arasında əlaqələrin uğurla inkişaf etdiyini, hər iki ölkənin əmıkdaşlığın genişlənməsinə böyük önəm verdiyini qeyd edib.

Nazir müavini həmçinin əlavə edib ki, iki ölkə arasında əlaqələrin daha da genişləndirilməsi üçün böyük potensial var. Onun sözlərinə görə, bugünku biznes forum da işadamları arasında əlaqələrin inkişafına müsbət töhfə verəcək.

Forumda çıxış edən İtaliyanın iqtisadi inkişaf nazirinin müavini Karlo Kalenda iki ölkə arasında iqtisadi əlaqələrin daha da genişlənməsi üçün mövcud potensialdan səmərəli istifadəni, iş adamları  arasında əlaqələrin genişləndirilməsinin İtaliya-Azərbaycan iqtisadi-ticarət əməkdaşlığının  inkişafında əhəmiyyətini, iqtisadi əlaqələrin inkişaf istiqamətlərini diqqətə çatdırıb.