Xəbərlər

Standartlaşdırma, Metrologiya və Patent üzrə Dövlət Komitəsinin Gəncə Ərazi İdarəsi tərəfindən Şəmkir rayonunda reyd keçirilib.

ERtv-nin bölgə müxbirinin verdiyi məlumata görə reyd çərçivəsində rayonda çörək məhsullarının istehsalı və satışı ilə məşğul olan qanunsuz sex aşkarlanıb.

Rayonun Hüseyn Cavid Küçəsində yerləşən “Qaqalar” MMC –yə məxsus çörəkbişirmə sexində reyd zamanı xeyli sayda nöqsanlar aşkarlanıb.

Aparılan yoxlamalarda sexdə çörəyin bişirilməsində mənşəyi məlum olmayan sudan, duzdan, mayadan, yağlardan və müxtəlif qatqılardan istifadə olunduğu üzə çıxıb. Bundan başqa istehsalatda xəmirin kustar üsullardan istifadə olunaraq antisanitar şəraitdə yoğrulması və çörək bişirilməsi halları da aşkarlanıb. Mütəxəssislər belə çörəklərin insan sağlamlığına mənfi təsir göstərdiyini bildirir. Həmçinin sexdə istismar müddəti başa çatmış avadanlıqlarla çörək bişirildiyi də məlum olub. Sexin sahibi aşkarlanan qayda pozuntuları ilə razılaşmayıb.

Aşkar olunan nöqsanlara görə, istehsal sahibinə cərimə sanksiyası tətbiq olunub və
sexin fəaliyyəti dayandırılıb.