Xəbərlər

Bu gün əksər məktəblərdə direktorlar uşaqların istirahətinin əleyhinədir, buna imkan vermirlər.

ERtv xəbər verir ki, bunu Milli Məclisin (MM) Sosial siyasət komitəsinin bu gün keçirilən iclasında komitə sədri Hadi Rəcəbli “Uşaqların istirahətinin təşkili haqqında” qanunun müzakirəsində deyib.

Komitə sədri müzakirə zamanı iclasda iştirak edən Təhsil Nazirliyinin nümayəndəsinə irad tutaraq qeyd edib ki, direktorlar tərəfindən uşaqlara bu məhdudiyyətlər qoyulduğu üçün sonda onların arasından narkomanlar, müxtəlif cinayət əməllərinin sahibləri çıxır.

Onun dediyinə görə, bununla bağlı valideynlər onlara - millət vəkillərinə müraciət edir:

“Məktəb direktorları isə buna imkan vermir”.

H.Rəcəbli direktorları bu hala son qoymağa və uşaqlara qarşı diqqətli olmağa çağırıb.

Komitə sədri icra hakimiyyəti başçılarını da tənqid edib.

“İmam ehsanları, orucluq iftarları olanda icra başçıları yuxarı başda, hər yerdə görünür. Amma uşaqlar üçün nəsə təşkil etmək lazım olanda qarınları ağrıyır, yoxa çıxırlar. Uşaqlara qarşı belə laqeydlik olmaz”, - deyə, komitə sədri sözlərinə əlavə edib.