Xəbərlər

Ümummilli lider Heydər Əliyevin 90 illiyinə həsr olunmuş futbol üzrə II Gənclər Kuboku turniri yekunlaşıb.

ERtv xəbər verir ki, turnir Gənclər və İdman Nazirliyi, Azərbaycan Futbol Federasiyaları Assosiasiyası (AFFA), “İrəli” İdman Mərkəzinin təşkilatçılığı, TİMSPORT idman malları mağazasının baş sponsorluğu və NIKE şirkətinin sponsorluğu ilə baş tutub.

Turnirin bağlanış mərasimi AFFA-nın inzibati binasında baş tutub.

Mərasimdə çıxış edən “İrəli” İctimai Birliyinin sədri Rauf Mərdiyev və AFFA-nın departament rəisi Yusif Vəliyev ölkəmizdə idmana göstərilən dövlət qayğısından danışıb və turnirin əhəmiyyətini yüksək qiymətləndiriblər.

Azərbaycanda futbolun kütləviləşməsi istiqamətində həyata keçirilən layihələrdən danışan natiqlər növbəti Gənclər Kuboku turnirinin təşkil olunması istiqamətində müzakirələrin aparıldığını vurğulayıblar və komandaları qazanılan uğur münasibətilə təbrik ediblər.

Yarışda qalib gələn Azərbaycan Tələbə Gənclər Təşkilatları İttifaqının komandasına qızıl medal, diplom, hədiyyələr və kubok təqdim olunub. Turnirdə Qan Donorları Assosiasiyası İctimai Birliyi ikinci, Ukrayna Azərbaycanlı Gənclər Birliyi isə üçüncü olub. II və III yerin qalibləri həmçinin medallar, hədiyyələr və diplomlarla təltif olunublar.