Xəbərlər

Bron edilən aviabiletdəki səhv səbəbindən britaniyalı Lamend Kinqdonu İspaniya əvəzinə, Karib adalarına göndərilib.

ERtv xarici mətbuata istinadən xəbər verir ki, 62 yaşlı qadın sərnişin “British Airways” şirkətinə məxsus təyyarənin göyərtəsində yol yoldaşına İspaniya səfərini səbirsizliklə gözlədiyini etiraf edib.

Yaşlı qadının yol yoldaşı isə ona təyyarənin ora uçmadığını bildirib. Məlum olub ki, bilet bron edilən zaman səhv baş verib və gediləcək ünvan İspaniyanın Qranada şəhəri kimi deyil, Karibin Qrenada adası kimi qeyd edilib.

“Mən biletə baxdım və orada həqiqətən Qrenada yazılmışdı. Mən gördüm ki, uçuş və eniş vaxtları çox fərqlidir, lakin güman etdim ki, bu, saat qurşaqları ilə əlaqədardır”, - deyə Kinqdon bildirib.

Sent-Lüsiya adasında planlaşdırılmış dayanacaq zamanı sərnişini Londona geri uçan reysə mindiriblər. Orada aviaşirkət nümayəndələri onu qarşılayıblar. Növbəti gün Kinqdon Qranada hava limanına yaxın yerləşən Malaqaya uçub.