Xəbərlər

İqtisadi İnkişaf Nazirliyinin Sahibkarlığa Kömək Milli Fondunun təşkilatçılığı ilə Qobustan rayonunun Cəyirli kəndində sahibkarlığın inkişafına dövlət dəstəyi çərçivəsində növbəti tədbir keçirilmişdir.

Tədbirdə 43 sahibkarlıq subyektinə 494,5 min manat güzəştli kredit verilmişdir. Bu kreditlər hesabına maliyyələşdirilən layihələrin reallaşması 70-dən çox yeni iş yerinin açılmasına imkan yaradacaqdırr.
Sahibkarlarla Qobustan iqtisadiyyatının perspektivləri, mövcud potensialın reallaşdırılması istiqamətində müzakirələr aparılmış, onlara cins heyvandarlıq və intensiv bağçılıq təsərrüfatlarının yaradılması üzrə nümunəvi investisiya layihələri və digər metodiki materiallar təqdim edilmişdir.

Qobustan Rayon İcra Hakimiyyəti başçısının müavini Məharət Əkbərov, iqtisadi inkişaf nazirliyinin sahibkarlığın inkişafı siyasəti şöbəsinin müdir müavini Hüseyn Paşayev və nazirliyin Dağlıq Şirvan regional bölməsinin müdiri Azər Qasımov çıxış edərək iştirakçılara “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” çərçivəsində regionlarda, o cümlədən Qobustanda görülən işlər və rayonun iqtisadi potensialının reallaşdırılması məqsədilə həyata keçiriləcək tədbirlər, ölkədə sahibkarlığın inkişafına göstərilən dövlət dəstəyi barədə ətraflı məlumat vermişlər.

Fondun şöbə müdiri Samir Hümbətov bildirmişdir ki, bu ilin ötən dövrü ərzində respublika üzrə sahibkarlıq subyektlərinə məxsus 3600-dən çox investisiya layihəsinin maliyyələşdirilməsinə 247,2 milyon manat güzəştli kredit ayrılmışdır. Bu layihələrin reallaşması 10 mindən çox yeni iş yerinin yaradılmasına imkan verir. Diqqətə çatdırılmışdır ki, bu müddətdə təkcə Dağlıq Şirvan iqtisadi rayonunda fəaliyyət göstərən sahibkarlar 1035 investisiya layihəsinin maliyyələşdirilməsi üçün 39,1 milyon manat güzəştli kredit almışlar. Bu hesaba 4400-dən çox yeni iş yerinin açılması nəzərdə tutulur.

Tədbir çərçivəsində Qobustan rayonunda güzəştli dövlət krediti hesabına maliyyələşdirilmiş sahibkar Mirdaməd Qarayevə və sahibkar Ramiz Novruzova məxsus heyvandarlıq təsərrüfatlarına baxış keçirilmişdir.