Xəbərlər

Rusiya prezidentinin İnsan Haqları üzrə Şurasının rəhbəri Mixail Fedotov hesab edir ki, rus polisi cinayətlərdə şübhəli bilinən şəxslərin saxlanılması zamanı mədəni olmağı öyrənməlidir.

ERtv “İnterfaks”a istinadən xəbər verir ki, bu barədə o, Xüsusi Operativ Reaksiya Qüvvələri xüsusi polis bölmələri əməkdaşlarının Moskvanın Qərbi Birülyevo rayonu sakini Yeqor Şerbakovun qətlində ittiham olunan azərbaycanlı Orxan Zeynalovun yaxalandığı videokadrlarla bağlı Moskvada keçirdiyi mətbuat konfransında bildirib.

“Burada biz teleserial üslubunda səhnələşdirilmiş həbs gördük”, - deyə M.Fedotov qeyd edib.

“Real həyatda özümüzü necə aparmalı olduğumuzu həyat televiziyaya deyil, əksinə, televiziya həyata diktə edir. Mənim qənaətimə görə, əgər yaxalanma məqamında orada telekamera olmasaydı, ola bilsin ki, proses tamamilə başqa cür olardı”, - deyə M.Fedotov bildirib.

Şura rəhbəri polislərə sovet filmlərindən örnək götürməyi təklif edib.