Xəbərlər

Keçmiş iqtisadi inkişaf naziri Fərhad Əliyev və onun qardaşı “Azpetrol” şirkətinin keçmiş prezidenti Rafiq Əliyev bu gün həbsdən azad ediliblər.

ERtv xəbər verir ki, Ədliyyə Nazirliyi Penitensiar Xidmətin 2 saylı cəzaçəkmə müəssisində 19 nəfər məhkum əfv sərəncamı əsasında azadlığa buraxılıb.

R.Əliyev cəza çəkdiyi 6 saylı cəzaçəkmə müəssisindən bu gün azad edilib.

Jurnalistlərlə söhbətində Rafiq Əliyev özünün və qardaşı Fərhad Əliyevin əfv olunmasına görə Prezident İlham Əliyevə minnətdarlıq bildirib. 

Fərhad Əliyev isə jurnalistlərə açıqlamasında deyib ki, bundan sonra da Azərbaycanın inkişafına xidmət edəcək, ölkə Prezidentinə sadiq qalacaq:

“Cənab prezidentə əfvlə bağlı müraciət etməyimdə təəccüblü heç nə yoxdur. Mənim həmişə bir sadiq amalım, düşüncəm olub.

Ona görə də həbs olunmamışdan əvvəl də, həbs olunduğum, istintaq dövründə də cənab Prezidentə sədaqətli olduğumu bildirmişəm.

Doğrudan da, azadlığa çıxmaq böyük bayramdır. Qardaşım Rafiq Əliyevin də azadlığa çıxması mənim üçün mühümdür. Ona görə cənab prezidentə minnətdarlığımı bildirirəm. Uzun müddətli həbsdən sonra cənab prezident mənim və qardaşımın azadlığa çıxması üçün qərar verdi.

Mənim üçün əziyyət çəkən, məni gözləyən bütün insanlara minnətdaram. Dörd gün sonra həbsdə olmağımın 8 ili tamam olurdu. Həbsdə insan heç cür istədiyi kimi ola bilmir”.

O deyib ki, bundan sonra harada işləməyimdən asılı olmayaraq, Azərbaycan xalqının, millətimizin inkişafına öz töhfəsini verməyə çalışacaq, Heydər Əliyev yoluna sadiq qalacaq.

Azərbaycan Prezidenti İlham Əliyevin oktyabrın 14-də imzaladığı əfv sərəncamı 153 məhkuma şamil olunub.

Onlardan 134 nəfəri azadlıqdan məhrum etmə cəzasının çəkilməmiş hissəsindən, azadlıqdan məhrum etmə cəzasına şərti olaraq məhkum edilmiş 2 nəfər cəzadan, 1 nəfər islah işləri cəzasından, 16 nəfər isə cərimə cəzasından azad edilib.

Əfv sərəncamı bir sıra xarici ölkə vətəndaşlarına da şamil olunub.

Ədliyyə Nazirliyi Penitensiar Xidməti bu gün əfv sərəncamının icrasına başlayıb.