Xəbərlər

Bu gün böyük Azərbaycan şairi Məmməd Arazın doğum günüdür.

ERtv xəbər verir ki, Məmməd Araz - İbrahimov Məmməd İnfil oğlu 1933-cü il oktyabrın 14-də Şahbuz rayonunun Nursu kəndində anadan olub.

Orta məktəbi Nursu kəndində bitirdikdən sonra indiki Azərbaycan Dövlət Pedaqoji Universitetində təhsil alıb.

1954-cü ildə ali təhsilini başa vuran Məmməd Araz əmək fəaliyyətinə doğma kəndindəki orta məktəbdə müəllimliklə başlayıb. Sonra Bakıya köçüb. Azərbaycan Nazirlər Soveti yanında Baş Mətbuat İdarəsində müvəkkil işləyib.

1959-1961-ci illərdə Moskvada Yazıçılar İttifaqı nəzdindəki Ali ədəbiyyat kurslarının müdavimi olub. Sonralar “Ulduz” jurnalının məsul katibi, “Ədəbiyyat və incəsənət” qəzetində, Azərbaycan Dövlət Nəşriyyatında baş redaktorun müavini olub.

M.Araz 1974-cü ildən ömrünün sonuna kimi “Azərbaycan Təbiəti” jurnalının baş redaktoru olub. Uzun müddət Yazıçılar İttifaqının poeziya bölməsinə rəhbərlik edib.

Xidmətlərinə görə “İstiqlal” ordeni (1995), bir medalla və Azərbaycan Ali Soveti Rəyasət Heyətinin Fəxri fərmanları ilə təltif edilib. Hacı Zeynalabdin Tağıyev adına milli mükafatın laureatıdır (1992). Onun adına “Məmməd Araz” mükafatı təsis olunub (1993).

M.Araz “Sevgi nəğməsi”, “Üç oğul atası”, “Araz axır”, “Mən səni taparam”, “Dünya düzəlmir”, “Daş harayı”, “Əsgər andı”, “Atamın kitabı” kimi bir çox əsərlərin müəllifidir.

O, 2004-ci ilin dekabrın 1-də Bakıda vəfat edib. Xalq şairi Fəxri xiyabanda dəfn olunub.