Xəbərlər

ATƏT-in Demokratik Təsisatlar və İnsan Haqları Bürosunun (ATƏT DTİHB) müşahidəçiləri seçki prosesinin gedişini izləyir.

ERtv xəbər verir ki, bu barədə ATƏT DTİHB-in direktoru Yanez Lenarçiç jurnalistlərə deyib.

O bildirib ki, müşahidələr haqqında ilkin rəy sabah açıqlanacaq, iki ay sonra isə yekun rəy təqdim olunacaq.

Yanez Lenarçiç deyib:

“ATƏT-in Demokratik Təsisatlar və İnsan Haqları Bürosunun 300- dən çox qısamüddətli müşahidəçisi Azərbaycanda prezident seçkilərini izləyir. Bizi seçkiləri müşahidə etmək üçün Azərbaycan hökuməti dəvət edib və bu, bizim hökümət qarşısında olan öhdəliyimizlə bağlıdır.

Uzunmüddətli müşahidə missiyamız 6 həftədir Azərbaycandadır. Missiyanın tərkibində müxtəlif ekspertlər və 30-a yaxın mütəxəssislər var. Biz seçki kampaniyasının bütün mərhələlərini, o cümlədən  kampaniyanın mediada işıqlandırılmasını, MSK-nın və ümumən seçki administrasiyasının fəaliyyətini, namizədlərin apardığı kampaniyanı izləmişik.

Eyni zamanda səsvermənin gedişini və məntəqələr bağlandıqdan sonra səslərin sayılması prosesi də müşahidəçilər tərəfindən izlənəcək”.
 
Onun sözlərinə görə, müşahidəçilər seçki günündən sonra da bir neçə gün ölkədə qalacaq və seçkidən sonrakı baş verən hadisələri, şikayətlər və  müraciətləri izləyəcəklər.