Xəbərlər

“TransAnadolu” boru kəmərinin (TANAP) 2018-ci ildə işə düşməsindən sonra da Azərbaycan qazı Türkiyədə İran və Rusiya qazından daha ucuz qiymətdə olacaq.

ERtv-nin Türkiyənin “Habertürk” qəzetinə istinadən verdiyi xəbərə görə, bu barədə “SOCAR Türkiyə”nin başçısı Kənan Yavuz bildirib.

O qeyd edib ki, hazırda olduğu kimi Azərbaycan qazı digər rəqiblərinə görə daha uyğun qiymətə satılacaq:

“Bir sözlə, rəqiblərimizə görə, rəqabət gücümüz daha yüksək olacaq”.

Qeyd edək ki, Türkiyə üçün Azərbaycan qazının qiyməti min kubmetr üçün 350 dollar təşkil edir.

Eyni həcmdə İran qazının qiyməti 500 dollar, Rusiya qazı isə 400 dollardır.

Hazırda Azərbaycanın “Şahdəniz-1” yatağından hasil olunan qazı Cənubi-Qafqaz boru kəməri ilə Türkiyə ərazisinə ixrac olunur.

TANAP layihəsinin işə salınmasından sonra isə ilkin mərhələdə “Şahdəniz” yatağının ikinci mərhələsi üzrə hasil olunan 6 milyard kubmetr qaz Türkiyə ərazisində satılacaq.

Azərbaycan və Türkiyə arasında TANAP layihəsi üzrə saziş 2012-ci il iyunun 26-da İstanbulda imzalanıb. Beş il ərzində reallaşması nəzərdə tutulan layihənin 10 milyard dollara başa gələcəyi nəzərdə tutulub.

TANAP layihəsində SOCAR 80%, Türkiyənin “BOTAŞ” və TPAO şirkətləri isə 20% paya malikdir.

SOCAR-ın layihədəki 29% payının  BP və “Statoil” şirkətlərinin hər birinə 12%, “Total” şirkətinə isə 5% pay vermək barədə razılığa gəlinib.