Xəbərlər

“Azadlıq” radiosunun fəaliyyətinə yönəlik narazılıq seçkilər dönəmində xüsusilə artıb.

Mövzu ilə bağlı fikirlərini ERtv-yə bildirən prezidentliyə namizəd Zahid Oruc “Azadlıq” radiosunun birtərəfli fəaiyyətini tənqid edib:

“Seçkilər dönəmində kütləvi informasiya vasitələrinin prosesləri hansı formada işıqlandırılmasının əhəmiyyəti başa düşüləndir.

Lakin bir sıra media orqanları, o cümlədən, “Azadlıq” radiosu belə mühüm mərhələdə peşəkarlığa və obyektivliyə əsla uyğun gəlməyən qaydada fəaliyyət göstərirlər.

“Azadlıq” radiosunun başqa bir dövlətə mənsubluğunu nəzərə alsaq, bu media qurumunun proseslərə məlum münasibətinin diqqətdən kənar qalması mümkün deyil.

Əslində, bu radionun kursuna baxdıqda, hansı məqsəd daşıdığını, ölkə daxilində konkret qrupun maraqlarından çıxış etdiyini, onun tribunasına çevrildiyini asanlıqla görmək olur.

Təəssüf ki, Azərbaycanda taleyüklü prezident seçkiləri dönəmində bu radio qeyd etdiyim qrupun namizədinin birmənalı təbliğatı ilə məşğuldir. Bu zaman nə peşəkarlıq, nə seçicilərin nə də digər namizədlərin maraqları nəzərə alınmır.

Xarici media vasitələrinin ölkədəki seçki təşviqatında iştirakına qanunla icazə verilmədiyindən, “Azadlıq” radiosu bununla həm də özü üçün məsuliyyət yaradır.

O baxımdan, Mərkəzi Seçki Komissiyasının  “Azadlıq” radiosu, eyni zamanda,  digər media orqanları ilə bağlı ortaya qoyduğu mövqe tam haqlıdır və qanunlara əsaslanır”.