Xəbərlər

“Akkord” korporasiyası “Gənclik” metrostansiyası yaxınlığındakı tunellərin su ilə dolması məsələsinə aydınlıq gətirib.

Şirkətin mətbuat xidmətindən ERtv-yə verilən məlumata görə, yağış sularının tunellərə dolmasına səbəb gecə leysan başlayan zaman tunellərdə suyun çıxarılması üçün nəzərdə tutulmuş cəmi bir nasos stansiyanın fəaliyyət göstərməsi olub.

“Biz yağışın bu qədər güclü olduğu barədə vaxtında məlumatlandırılmamışıq. Bu səbəbdən 1 saylı nasos stansiyası yağış sularının tunellərdən çıxarılmasının öhdəsindən gələ bilməyib, dərhal fövqəladə vəziyyətlər üçün nəzərdə tutulmuş ikinci stansiya işə salınıb. İkinci stansiya işə salındığı andaca tunellərdəki problem aradan qaldırılıb. Hazırda bu problem tam olaraq öz həllini tapıb”, - deyə Akkord-dan bildiriblər.

Koorporasiyanın mətbuat xidmətindən qeyd ediblər ki, tunelin su ilə dolması təkcə güclü yağışla əlaqəli deyil:

“Yağış yağan zaman mövcud drenaj sistemi yağış sularının öhdəsindən gələ bilməyib və paytaxtın mikrorayonlarından su axını Atatürk, Ziya Bünyadov prospektləri və Gənclik metrostansiyası istiqamətində hərəkət etməyə başlayıb”.

“Akkord”un məlumatında bildirilir ki, hazırda bütün yeni yol qovşağı sistemi yaxşı vəziyyətdədir və su axını ilə bağlı heç bir ziyan dəyməyib”.

Xatırladaq ki, Akkord-un “Qələbə meydanı” müxtəlif səviyyəli tunel tipli yol qovşağı layihəsi çərçivəsində inşa etdiyi beş tunelin açılışı cari ilin sentyabr ayının 2-də olub.