Xəbərlər

Türkiyə-Ermənistan sərhədlərinin açılması məsələsi yenidən Avropa Parlamentinin gündəminə gətirilir.

ERtv TurkishNY.com portalına istinadən xəbər verir ki, Avropa Parlamentində bu mövzuda keçirilən dinləmələrə Türkiyədən jurnalist Cengiz Aktar və Ermənistandan politoloq Riçard Kirakosyan qatılıb.

C.Aktar öz çıxışında Azərbaycan faktorunun Türkiyədə böyük bir rol oynamağa davam etdiyini bildirib:

“Azərbaycanın bu barədə mövqeyi dəqiqdir: Ermənistanın Dağlıq Qarabağı geri qaytarmayacağı təqdirdə, Türkiyə Ermənistanla münasibətləri normallaşdırmamalıdır”.

Dinləmədə çıxış edən Türkiyənin Avropa İttifaqındakı nümayəndəsi Selim Yenel  Ermənistanın Qarabağ münaqişəsinin həlli istiqamətində konkret addımlar atmasının vacibliyini deyib:

“Bundan hamımız qazanarıq. Köklü dəyişikliklərə ehtiyacımız var və bu məsələdən başlaya bilərik”.

S.Yenel Azərbaycanın Türkiyə-Ermənistan münasibətlərinə ciddi təsir imkanlarına malik olması haqda suala belə cavab verib:

“Türkiyə və Azərbaycan iki fərqli ölkə ola bilər, amma biz tək bir millətik. Azərbaycanı nəzərə almaya bilmərik.

Azərbaycanın haqsız münasibətə məruz qaldığını görürük və Ermənistanın bunu düzəltmək istiqamətində addım atmasını gözləyirik”.