Xəbərlər

SOCAR xarici ölkələrdəki layihələrə 2013-cü ilin avqust ayına olan məlumata əsasən, 2,9 milyard dollar məbləğində investisiya yatırıb.

ERtv xəbər verir ki, bu barədə jurnalistlərə SOCAR-ın iqtisadi məsələlər üzrə vitse-prezidenti Süleyman Qasımov bildirib.

O qeyd edib ki, bu məbləğ həm Türkiyədə, həm Ukraynada, həm Gürcüstanda, həm də İsveçrədə həyata keçirilən yatırımları əhatə edir:

“Bu layihələr birdən pul vəsaiti tələb etmir. Məsələn, “Star” layihəsi 5 milyard dollar məbləğində dəyərləndirilirsə, onun 35%-i səhmdar kapitalındadır. Həmin səhmdar kapitalının da 41,5%-i SOCAR-ın üzərinə düşür ki, bu rəqəm də 600-700 milyon dollar məbləğində olacaq.

Tikinti dövrünü əhatə  edəcək 4-5 il ərzində bu rəqəm ödəniləcək. Buna görə də 2,9 milyard dollar böyük rəqəmlərin arasında cılız görünsə də, SOCAR üçün bu rəqəm böyük rəqəmdir”.

Şirkətin vitse-prezidenti daxili investisiyalardan da danışaraq qeyd edib ki, ildə 1 milyard dollar neft qaz quyularının qazılması, platformaların tikintisi, boru xətlərinin çəkilişinə ayrılır.