Xəbərlər

Bakıda Xəzər-Avropa İnteqrasiya İşgüzar Klubunun (CEİBC) tərkibində fəaliyyət göstərən “Caspian-European Tourism Club”un qapalı müşavirəsi keçirilib.

Tədbirə “Grand Hotel Europe” otelinin baş meneceri, “Caspian-European Tourism Club”un həmrəhbəri Elgün Məmmədov sədrlik edib.

ERtv xəbər verir ki, müşavirədə Azərbaycandakı otellərin, aviaşirkətlərin və turizm şirkətlərinin rəhbərləri iştirak ediblər.

Sözügedən tədbir CEİBC-yə üzv olan şirkətlərin ölkənin mədəniyyət və turizm, nəqliyyat, maliyyə, vergi, iqtisadi inkişaf, əmək və sosial müdafiə nazirləri, eləcə də Mərkəzi Bankın, Standartlaşdırma, Metrologiya və Patent üzrə Dövlət Komitəsi, Qiymətli Kağızlar üzrə Dövlət Komitəsi və Milli Məclisin rəhbərliyi ilə görüşünə hazırlıq çərçivəsində baş tutub.

CEİBC-nin baş icraçı direktoru Telman Əliyev tədbir iştirakçılarına klubun məqsədlərindən və vəzifələrindən danışıb. O, biznes-hakimiyyət dialoqunun yaradılması məqsədilə iqtisadiyyatın müxtəlif sahələrinin nümayəndələri üçün belə tədbirlərin təşkilinin vacib olduğunu qeyd edib və əlavə edib ki, şirkətlər biznes mühitinin yaxşılaşmasına kömək edə biləcək dövlət qurumlarının nümayəndələrinə təklifləri özləri etməlidirlər.

Elgün Məmmədov Azərbaycanın Mədəniyyət və Turizm Nazirliyinin ölkədə turizm sektorunun inkişafındakı xüsusi rolunu qeyd edib. O, şirkətlərə yalnız problemlər barədə bəhs etməməyi, həm də sözügedən problemlərin həlli yollarını göstərmələrini təklif edib.

Eləcə də o, şirkətlərə Azərbaycanın nüfuzunun yüksəldilməsində daha fəal iştirak etməyi tövsiyə edib.

Şirkətlər maliyyə sahəsində onları maraqlandıran sualları və problemləri müzakirə ediblər və onların həlli yollarını nəzərdən keçiriblər.