Xəbərlər

Azərbaycan dünyada mühüm bir ölkəyə çevrilib. Xüsusən də enerji təhlükəsizliyinin təmin olunmasında əhəmiyyətli rola malikdir.

ERtv xəbər verir ki, bu barədə “Starfor” analitik mərkəzinin rəhbəri Corc FridmanStrateji Araşdırmalar Mərkəzinin təşkilatçılığı ilə Beynəlxalq Münasibətlər üzrə Alimlər Assosiasiyasının 2-ci “Dəyişən Dünyada Cənubi Qafqaz” adlı forumunda çıxışı zamanı deyib.

“Azərbaycan sənayenin inkişafına xüsusi diqqət yetirir və müasir texnologiyalar tətbiq edir. Azərbaycan ilə ABŞ arasında münasibətlərin inkişafı aydın təzahür edir”.

O vurğulayıb ki, ABŞ Azərbaycanın ən yaxşı müttəfiqidir:

“Azərbaycan və ABŞ-ın birgə maraqları var. Bir sıra məsələlərdə çətinliklər olsa da hər il maraqların daha da yaxınlaşdığının şahidi oluruq. Artıq bu iki ölkə arasında münasibətlər dönüş nöqtəsinə çatıb. Bu səbəbdən də Azərbaycan tərəf ABŞ-dan səslənən bəzi fikirlərə dözümlülük nümayiş etdirməlidir, çünki ABŞ-dan həm Azərbaycanın xeyrinə, həm də əksinə fikirlər səslənə bilər”.

Fridman bildirib ki, dünya dəyişir, lakin Azərbaycanın maraqları dəyişmir:

“Bu milli maraqlar isə Azərbaycanın regionda və dünyada stabil inkişaf etməsi, həmçinin fövqəldövlətlərdən asılı olmamasından ibarətdir. Bu da məhz Heydər Əliyevin vaxtında uzaqgörən siyasətin nəticəsində əldə olunub”.

O həmçinin qeyd edib ki, Azərbaycanın vahid Avropaya daxil olması mümkün deyil, çünki Avropanın özündə vahidlik qalmayıb:

“Kim fikirləşir ki, əvvəlki Avropaya qayıdılacaq, bu xəyaldan başqa bir şey deyil. Avropa qalacaq, ancaq millətlər qitəsinə çevriləcək. Avropanın çökməsi isə Rusiyaya revanş imkanı yaradır.

Bu o demək deyil ki, Rusiya güclüdür, sadəcə ətrafı zəifdir. Bu səbəbdən Rusiyaya şeytan kimi, Avropaya isə müqəddəs kimi baxmaqdan əl çəkmək lazımdır”.

C.Fridman vurğulayıb ki, ABŞ-ın regionda maraqları var və onun mövcudluğunu yaxın gələcəkdə görəcəyik:

“Bu baxımdan Azərbaycan-ABŞ münasibətlərinin inkişafı zəruridir. Bunun üçün Azərbaycanın imkanları və dostları var”.