Xəbərlər

Azərbaycanın Birləşmiş Millətlərin Ümumdünya Turizm Təşkilatının İcraiyyə Şurasının üzvlüyünə namizədliyi müzakirə olunub və ölkəmizin şuraya üzvlüyü təsdiqlənib.

ERtv-nin Mədəniyyət və Turizm Nazirliyinə istinadən verdiyi xəbərə görə, bu, Zambiya və Zimbabvedə keçirilən BMÜTT Baş Assambleyasının 20-ci sessiyası çərçivəsində bu gün Zambiyanın Livinqston şəhərində keçirilmiş növbəti iclas zamanı baş verib.

Qeyd edək ki, Avropa qitəsinin 4 dövlətinin (Azərbaycan, Almaniya, Serbiya və Bolqarıstan) sırasında Azərbaycan üzvlüyə 25 səslə birinci olaraq seçilib.

Ümumilikdə, seçilmiş dörd ölkə üzrə səslər aşağıda göstərildiyi kimi bölüşdürülüb:

1.Azərbaycan - 25 səs
2. Almaniya - 24 səs
3. Serbiya - 20 səs
4. Bolqarıstan - 18 səs

Eyni zamanda, Azərbaycanın təklifi nəzərə alınaraq BMÜTT-nin Avropa Komissiyasının 2014-cü il iclasının Bakıda keçirilməsinə dair qərar qəbul olunub.

Qeyd edək ki, sözügedən qərarların müzakirəsi zamanı Ermənistan Respublikasının nümayəndə heyəti etirazını bildirib, lakin Ermənistanın mövqeyi digər iştirakçılar tərəfindən dəstəklənməyib.