Xəbərlər

Bu gün xarici işlər naziri Elmar Məmmədyarov İtaliya Respublikasının ölkəmizə yeni təyin olunmuş səfiri Ciampalo Kutillonu qəbul edib.

ERtv XİN-in rəsmi saytına istinadən xəbər verir ki, nazir Ciampalo Kutillonu ölkəmizə səfir təyin olunması münasibəti ilə təbrik edib və ona gələcək fəaliyyətində uğurlar arzulayıb.

İtaliyanın Azərbaycanın əsas ticarət tərəfdaşlarından biri olduğunu qeyd edən nazir, yeni təyin olunmuş səfirin iki ölkə arasındakı bütün sahələrdə münasibətlərin daha da inkişafına töhfə verəcəyinə əminlik ifadə edib.

C. Kutillonu Azərbaycana səfir təyin olunmasından məmnunluğunu ifadə edib. Ölkəsinin Azərbaycanla əməkdaşlığın daha da genişlənməsində maraqlı olduğunu qeyd edən səfir, diplomatik fəaliyyəti müddətində ölkələrimiz arasındakı münasibətlərin genişləndirilməsi istiqamətində səylər göstərəcəyini bildirib.