Xəbərlər

Bu gün səhər saatlarından Azərbaycanın şimal-qərb bölgəsinə təbii qazın verilməsində fasilə yaranıb.

Bu barədə ERtv-yə Zaqatala Qaz İstismar Sahəsindən məlumat verilib.

Sahənin növbətçi hissəsindən verilən məlumata əsasən, bu gün səhər saat 08:30 radələrindən ölkənin şimal-qərb bölgəsinə daxil olan Qax, Zaqatala və Balakən rayonlarına təbii qazın verilməsi dayandırılıb.

Fasilələrin yaranmasına səbəb kimi 530 mm-lik Yevlax-Balakən magistral qaz kəmərinin 58-59-cu, 59-61-ci və 61-62-ci km-lərinə yeni qaz xətlərinin qoşulması göstərilir. Səhər saatlarında etibarən Ağdaş Magistral Kəmərləri İdarəsinin əməkdaşları kəmərin adıçəkilən hissələrində yeni xətlərin birləşdirilməsi işlərini həyata keçirir.

Zaqatala Qaz İstismar Sahəsindən bildirilib ki, kəmərdə xətlərin dəyişdirilməsi başa çatan kimi rayonlara təbii qazın verilməsi bərpa olunacaq.