Xəbərlər

Bu gün Türkiyənin ictimai düşüncəsi, mediası, qeyri-hökumət təşkilatları, hətta sıravi vətəndaşları Ermənistanın Qarabağ məsələsinə görə təklənməsinin tərəfdarıdırlar.

Bu sözləri ERtv-yə Ankaradan Bilkənt Universitetinin müəllimi, türk dünyası üzrə tanınmış analitik Həsən Əli Qarasar bildirib.

“Hələ Qarabağ məsələsinə görə, vahid mövqe daha da güclənəcək. Buna zaman lazımdır və amma bu proses sürətlə getməkdədir. İstər Türkiyə olsun, istərsə də türk dünyasının ictimai düşüncəsi buna doğru gedir. Qarabağ məsələsində uzunmüddətli strateji plan ortaya qoyulmalıdır. Türk dünyasında keçirilən bütün tədbirlərdə Qarabağ həqiqətləri ilə bağlı ortaq bəyanatlar qəbul edilməlidir.

Qeyri-hökumət təşkilatlarının, eləcə də medianın bu məsələdə vahid birliyi hiss olunmalıdır. Bu proses Orta Asiya türk dövlətlərində və Türkiyədə getməlidir. Doğrudur, Türkiyədə millətçilik düşüncəsinə malik olan ziyalılar Qarabağ məsələsində birmənalı mövqeyə malikdirlər” – deyə, analitik qeyd etdi.