Xəbərlər

Ermənistanın Müdafiə Nazirliyi azərbaycanlı hərbi əsir Firuz Fərəcovun qaytarılması məsələsini müzakirə etməyə hazır olduğunu ifadə edib.

ERtv  “Armenia Today”a istinadən xəbər verir ki, bu barədə erməni nazirliyinin mətbuat katibiArtsrun Ovannisyan məlumat verib.

Azərbaycan hərbi əsiri ötən il iyulun 26-da əsir düşüb. Erməni tərəfinin iddiasına görə, o erməni-Azərbaycan sərhədini keçib və təslim olub.

Ötən günlərdə Ermənistan müdafiə nazirinin müavini David Tonoyan Beynəlxalq Qırmızı Xaç Komitəsinin nümayəndəsi Draqan Rankoviçlə görüşdə bildirib ki, Firuz Fərəcov Azərbaycana qayıtmaq niyyətində olduğunu söyləyib. Həmçinin artıq bir həftədir ki, erməni əsgəri Akop İnciqulyan Azərbaycanda əsirlikdədir.

Artsrun Ovannisyan “Azatutyun” radiostansiyasının “belə çıxır ki, erməni tərəfi hərbi əsirlərlə mübadilə etməyə hazırdır?” sualına belə cavab verib:

“Əgər bu, beynəlxalq qurumlarla müzakirə olunarsa, əlbəttə hazırdır. Erməni tərəfi qanuni əsaslarla nə bahasına olursa olsun öz vətəndaşlarını geri qaytarmağa, bizdə olan Azərbaycan əsgərinin onun istəyi ilə mübadilə etməyə hazırdır”.