Xəbərlər

Xalq Cəbhəsi Partiyası (AXCP) vətəndaşlıq problemini həll edə bilməyən Rüstəm İbrahimbəyovu artıq küncə sıxışdırır.

ERtv xəbər verir ki, AXCP sədri Əli Kərimlinin və müavinlərinin son çıxışlarında Milli Şuranın ehtiyat vahid namizədinin ən qısa vaxtda müəyyənləşdirilməsinin vacibliyi qeyd olunur.

Bu çərçivədə diqqət çəkən məqam bundan ibarətdir ki, AXCP sədri verdiyi açıqlamalarda özünün də Milli Şuranın vahid namizədi olmaq iddiasını daha qəti şəkildə büruzə verir.

Bir müddət əvvəl Milli Şuranın vahid namizədinin “nüfuzlu ziyalı”lardan birinin olacağını deyən Ə.Kərimli artıq qurumun yeni namizədinin siyasətçilər arasından müəyyənləşdirilməsinin mümkünlüyünü də qeyd edib.

AXCP sədrinin müavini Razi Nurullayev də özünün Facebook səhifəsində paylaşdığı statusda R.İbrahimbəyovun məsələsinə tezliklə aydınlıq gətirilməsinin vacibliyini yazıb:

“Milli Şura seçkilərə mütləq qatılmalıdır. Mütləq. O seçkidə iştirak üçün yaradılıb və bu missiyanı da sona çatdırmalıdır.

Milli Şura vahidlik platforması üzərində formalaşıb. Elə buna görə də bu status saxlanılmaqla, yeni bir namizədi tez də müəyyən etmək olar.

Rüstəm İbrahimbəyov inanıram ki, 19 avqustdan daha tez özünün namizəd olub-olmamasını söyləyə bilər. Bu MŞ-ya əlavə vaxt qazandıra bilər.

Çox istəyirik o olsun. Amma çox dəyərli olan zamanı itirməkdə davam edirik.
Seçkiyə isə qatılmalıyıq”.