Xəbərlər

Şəkinin dünyaca məşhur olan “Gələrsən-Görərsən” qalasına gedən yolda baş verən yol-nəqliyyat hadisəsi zamanı bəy də daxil olmaqla 4 nəfər müxtəlif dərəcəli ağır bədən xəsarətləri alıb.

Bu barədə ERtv-nin bölgə müxbirinə Şəki Rayon Polis Şöbəsindən məlumat verilib. Bildirilir ki, Şəkinin Kiş kənd sakini 34 yaşlı Əfqan Tahirovun idarə etdiyi 66-BH-435 dövlət nömrə nişanlı “VAZ-2106” markalı avtomobillə Şəki şəhər sakini 36 yaşlı İlham Vələdovun idarə etdiyi 90-VM-063 dövlət nömrə nişanlı “Hyundai” markalı avtomobil toqquşub.

Qəza nəticəsində “VAZ-2106” markalı avtomobil aşıb. Bu zaman avtomobildə olan 5 nəfərdən 4-ü - sürücü Əfqan Tahirov və oglu 13 yaşlı Dəryal Tahirov, sərnişinlər Habil İsayev və Sahib Həsənov xəsarət alıb.

Hadisə şahidlərinin köməyi ilə xəsarət alanlar dərhal Şəki Mərkəzi Rayon Xəstəxanasına çatdırılıblar. Hadisə nəticəsində “Jiquli” markalı avtomobil tamamilə yararsız hala düşüb.

İlkin araşdırmalarla məlum olub ki, hadisə “Jiquli”nin “Hyundai” markalı avtomobilin yoluna çıxması nəticəsində baş verib.

“VAZ-2106” markalı avtomobildə olanlar nişan mərasimindən gəlirmiş və onlar içkili vəziyyətdə olublar. Həmin avtomobildə bəy də olub və xöşbəxtlikdən o xəsarət almayıb.  

Faktla bağlı Şəki Rayon Polis Şöbəsində araşdırma başlanılıb.