Xəbərlər

“Konstitusiya” Araşdırmalar Fondu və “Qadınlar Arasında Həmrəylik” İctimai Birliyi tərəfindən keçirilən “Qadınların inkişafı naminə ictimai maraqların qorunması” layihəsinin yekunlarının və gender siyasətinin həyata keçirilməsi ilə bağlı hazırlanmış təkliflərin təqdimatı keçirilib.

ERtv xəbər verir ki, tədbirdə yerli QHT-lərin, beynəlxalq təşkilatların nümayəndələri, hüquqşünas ekspertlər, KİV təmsilçiləri iştirak ediblər.

“Kounterpart İnterneşnl” təşkilatının Azərbaycan nümayəndəliyinin rəhbəri İlqar Ağasıyev bildirib ki, layihə ABŞ Beynəlxalq İnkişaf Agentliyinin maliyyə dəstəyi ilə “Kounterpart İnterneşnl” təşkilatı tərəfindən icra olunan “Qadın iştirakçılığı proqramı” çərçivəsində həyata keçirilib:

“Bu proqram çərçivəsində 5 koalisiya formalaşıb və uğurlu layihələr həyata keçirilib. 1 il 8 ay müddətində həyata keçirilən layihələr BMT-nin “Qadınlara qarşı bütün növ ayrı-seçkiliyin qarşısının alınması üzrə Konvensiyası” (CEDA BMT-nin “Qadınlara qarşı bütün növ ayrı-seçkiliyi qarşısının alınması üzrə Konvensiyası” (CEDAW), qadın hüquqlarının qorunması, qadın iştirakçılığının genişləndirilməsi ilə bağlı məsələlərin gündəliyə gətirilməsi, müzakirəsi, ictimai diqqətin bu problemlərə yönəldilməsi baxımından əhəmiyyətli töhfələr veriblər”.

İ.Ağasıyevin sözlərinə görə, xüsusən layihələrin icrası KİV-in bu məsələlərə diqqətinin artmasına səbəb olub.

Həmçinin, CEDAW Konvensiyası barədə məlumatlılığın artması müşahidə edilir. Onun sözlərinə görə, layihə çərçivəsində regionlarda ictimai dinləmələrin keçirilməsi, təlimlər, sosial çarxın çəkilməsi, bülletenlərin nəşri və saytın yaradılması, alternativ hesabatın hazırlanması və digər fəaliyyətlər də bu istiqamətdə öz təsirini göstərib.

“Qadınlar Arasında Həmrəylik” İctimai Birliyinin sədri Ruhəngiz Hüseynova layihə fəaliyyətləri və yekunlar barədə məlumat verib. O bildirib ki, layihənin məqsədi cəmiyyətdə qadınların aktiv sosial qrup kimi formalaşması üçün BMT-nin “Qadınlara qarşı bütün növ ayrı-seçkiliyi qarşısının alınması üzrə Konvensiyasının” (CEDAW) Azərbaycan hökumətinə tövsiyələrinin icrası və təbliği üçün ictimai vəkillik kampaniyasının həyata keçirilməsidir.