Xəbərlər

“Avrasiya Beynəlxalq Araşdırmalar İnstitutu” İctimai Birliyi Azərbaycanın əməkdar artisti Tünzalə Ağayevanın “Ona gedən Yol...” adlı təsəvvüf konsert proqramını təşkil edir.

ERtv xəbər verir ki, konsert müqəddəs Ramazan Bayramı münasibətilə şəhid ailələri, Milli Qəhrəman ailələri, qaçqın və məcburi köçkünlər və eləcə də musiqisevərlər üçündür.

Konsert proqramında T.Ağayevanın ruhları oxşayacaq, insanı düşünməyə çağıracaq təsəvvüf musiqisi yer alacaq. Konsertdə sözləri millət vəkili Qənirə Paşayevaya, musiqisi Tünzalə xanıma aid olan yeni mahnı “Qapını aç bu quluna, ey Rəbbim!” ilk dəfə dinləyicilərə təqdim olunacaq. “Qapını aç bu quluna, ey Rəbbim!” hər bir insanı düşünməyə, saflaşmağa, xətalarından tövbə etməyə, özünü və Yaradanı dərk etməyə, Ona gedən Yola səsləyir.

Konsert proqramında T.Ağayeva Hüseyn Cavid, Mirvari Dilbazi şeirlərinə yazdığı yeni mahnılarını, böyük Nəsimidən “Dua” və yazdığı bir sıra məşhur əsərlərini və ayrıca türk dünyasında tanınan əsərləri səsləndirəcək. Konsertin xüsusi qonağı xalq artisti xanəndə Nəzakət Teymurovadır.

Tədbir 8 avqust tarixində M.Maqomayev adına Azərbaycan Dövlət Filarmoniyasında keçiriləcək.