Xəbərlər

Avqustun 3-də dəmiryolunun Biləcəri stansiyasında 1100 metr yolun əsaslı təmirinə başlanılıb.

Yolun bu hissəsində işlər iki gün davam edəcəkdir.

Bununla da dəmiryolunun Bakı-Biləcəri sahəsində iyulun 13-də başlanılmış 9 kilometr yolun əsaslı təmiri başa çatacaq.

“Azərbaycan Dəmir Yolları” Qapalı Səhmdar Cəmiyyətinin (QSC) mətbuat xidmətindən ERtv-yə verilən xəbərə görə, əsaslı təmir işlərini QSC-nin “Dəmiryolservis” MMC-nin müəssisələri həyata keçirirlər.

“Azərbaycan Respublikasında dəmiryol nəqliyyat sisteminin 2010-2014-cü illərdə inkişafına dair Dövlət Proqramı”nın icrası çərçivəsində əsaslı təmir işlərinə 2011-ci ilin iyunun 10-da Tatlı-Ağstafa sahəsinin 97-ci kilometrində başlanılmış, bu günədək 262,6 kilometr yol əsaslı təmir olunmuşdur. Bunun da 191 kilometrinin 800 metrlik uzun ölçülü relslərlə əvəzlənməsi başa çatıb.

İnfrastruktur departamenti tərəfindən Bakı-Böyük Kəsik istiqamətində əsaslı təmir olunması nəzərdə tutulan yolda işlərin ardıcıllığı müvafiq cədvələ uyğun həyata keçirilir.

Yolların əsaslı təmiri prosesini Çexiyanın “İxrac” Bankının nəzarət qrupu müşahidə edir.