Xəbərlər

Türkiyənin Xarici İşlər Nazirliyi erməni əsgərlərin sərhədi səhvən keçmiş turkiyəli çoban Mustafa Ülkəri qətlə yetirmələrinə kəskin narazlığını bildirib.

ERtv “Anadolu” İnformasiya Agentliyinə istinadən xəbər verir ki, Türkiyənin xarici siyasət idarəsi bu hadisə ilə əlaqədar xüsusi açıqlama yayıb.

Açıqlamada günahsız Türkiyə vətəndaşının bəsit bir sərhəd pozuntusu səbəbi ilə Ermənistan sərhədçiləri tərəfindən atəş açılaraq öldürülməsi pislənilib.

M.Ülkərin cənazəsinin Türkiyəyə gətirildiyi və məsələyə dair diplomatik hərəkətlərə başlanıldığı qeyd olunan açıqlamada Ermənistanın bu davranışının izahı olmadığı vurğulanıb:

“Günahsız bir vətəndaşımızın tamamilə üzürlü səbəblə yol verdiyi sərhəd pozuntusu üzündən atəş açılaraq öldürülməsini qətiyyətlə pisləyirik.

Ermənistanın sərhəddə yaranan təbii bir hala qarşı əsassız güc tətbiqinin izahatı yoxdur”.

Sənəddə bu kimi halların Cənubi Qafqazda vəziyyətin sabitləşməsinə mane olduğu da diqqətə çatdırılıb:

“Bu və buna bənzər hadisələr Cənubi Qafqaz regionunda tam, dayanıqlı normallaşmaya mane olmaqla yanaşı, Ermənistanın da qonşuları ilə münasibətdə sağlam düşüncəyə ehtiyacı olduğunu bir daha təsdiqlədi”.

Çoban Mustafa Ülkər iyulun 31-də Ermənistanla sərhəddəki Akyaka yaylağında qoyun sürüsünü otararkən, səhvən bu ölkənin ərazisinə keçib və erməni sərhədçiləri tərəfindən qətlə yetirilib.

Onun cənazəsi dünən Türkiyəyə gətirilib.