Xəbərlər

Amerika hərbi məhkəməsi çərşənbə axşamı minlərlə gizli hərbi və diplomatik sənədləri “Wikileaks”ə ötürən hərbçi Bredli Menniqi oğurluq və casusluqda müqəssir bilib. Lakin o, ömürlük cəza ala biləcəyi düşmənə yardım ittihamı üzrə bəraət alıb.

ERtv BBC-yə istinadən xəbər verir ki, “WikiLeaks”in təsisçisi Culian Assanj amerikalı hərbçinin mühakiməsini pisləyib.

Assanj bildirib ki, Menninqin hərəkətlərindən yalnız Amerika hökumətinin iftixarına zərər gəlib. “WikiLeaks” təsisçisinin sözlərinə görə, onlar tərəfindən açıqlanan sənədlər “ərəb baharı”nın başlanmasına töhfə verdi.

“Məhkəmə bu iş üzrə heç vaxt ədalətli olmayıb. “WikiLeaks” o həbsdə ikən sakitləşməyəcək”, - deyə Assanj qeyd edib.

Menninq üçün nəzərdə tutulan həbs cəzası bu gün açıqlanacaq. Hətta ikinci dərəcəli ittiham ilə onu 100 ildən çox azadlıqdan məhrumetmə cəzası gözləyir.

Qeyd edək ki, Assanj Ekvadordan sığınacaq istəyib və artıq bir ildən çoxdur ki, bu ölkənin Londondakı səfirliyindədir.