Xəbərlər

Qurum təmsilçilərinin Tbilisi görüşünün gündəliyinə dair ziddiyyətli açıqlamalar veriblər.

ERtv xəbər verir ki, Milli Şura nümayəndələrindən bir qisminin “Tbilisidə ehtiyat namizəd məsələsi müzakirə olunacaq” açıqlaması qarşı tərəfdən təkzib olunub.

Milli Şuranın İctimai əlaqələr komissiyasının sədri Mehman Əliyev “Yeni Müsavat” qəzetinə açıqlamasında bunları deyib:

“Görüşdə ölkədəki siyasi vəziyyət, Rüstəm İbrahimbəyovun ölkəyə gəlişi, ehtiyat variantlar müzakirə olunacaq. Rüstəm İbrahimbəyovun namizədliyi qeydə alınmayacağı təqdirdə, Milli Şuranın seçkilərdə iştirak məsələsi müzakirə olunacaq.

Milli Şurada seçkilərdə mütləq iştirakın tərəfdarı və boykot tərəfdarı olanlar var. Rüstəm müəllimin iştirakı ilə bunlar bir daha müzakirə olunacaq”.   

M.Əliyevin “ehtiyat variantlar” dedikdə, Milli Şuranın “ehtiyat namizəd” məsələsini nəzərdə tutması “Yeni Müsavat”ın həmin xəbərinin başlığında da əks olunub.

Bununla belə, Milli Şuranın icra aparatının rəhbəri Eldar Namazov modern.az-a açıqlamasında bunun əksini deyib:

“Tbilisi görüşündə Milli Şuranın yeni vahid namizədi ilə bağlı müzakirələr gözlənilmir”.

Qeyd edilən açıqlamaların daban-dabana zidd olması Milli Şura təmsilçilərinin özləri ilə birgə aralarındakı ixtilafları da Tbilisə aparacaqlarını deməyə əsas verir.