Xəbərlər

Tunisdə müxalifətçi deputat qətlə yetirilib.

Tunisin böyük şəhərlərində əhali küçələrə axışaraq hökumətin istefasını və Milli Təsis Məclisinin buraxılmasını tələb ediblər.

ERtv-nin verdiyi xəbərə görə, bu barədə məlumatı “əl-Cəzirə” telekanalı yayıb. Məlumata əsasən, yüzlərlə vətəndaş Milli Həmkarlar İttifaqının qarşısında toplaşaraq müxalifçi deputat, Xalq Cərəyanı Partiyasının rəhbəri Məhəmməd Əl-Brahimiyə qarşı törədilən sui-qəsdə etiraz edib.

Təhlükəsizlik qüvvələri dövlət müəssisələrinə gedən yolları nəzarətə götürüblər.
Sidi-Buzid şəhərində etirazçılarla polis arasında qarşıdurma baş verib.

Nümayişçilər şəhərin bəzi küçələrində yanğınlar törədiblər. Aksiyaların dağıdılmasında gözyaşardıcı qazdan istifadə olunub.

Bundan əlavə, Milli Təsis Məclisində müxalifəti təmsil edən 3 deputat Əl-Brahiminin öldürülməsinə etiraz olaraq istefa verib.

Qeyd edək ki, deputatın ölümünə görə ölkədə matəm elan olunub.