Xəbərlər

Azərbaycanın bəzi rəsmi şəxslərinin ölkəyə giriş və çıxışına qadağa qoyulmasına dair yeni iddialar ortaya atılıb.

ERtv xəbər verir ki, bu dəfə Azərbaycanın Serbiya, Monteneqro və Bosniya-Herseqovinadakı səfiri Eldar Həsənovun ölkəyə gəlişinin məhdudlaşdırılması haqqında məlumat yayılıb.

Ana Vətən Partiyasının (AVP) sədri, parlamentin deputatı Fəzail Ağamalı Gün.Az-a açıqlamasında belə informasiyaların haradan qaynaqlandığını başa düşmədiyini deyib:

“Azərbaycanda nə dövlət məmurlarının, nə də sıravi vətəndaşların ölkə ərazisini tərk etmələrinə, yaxud da ölkəyə daxil olmalarına məhdudiyyətlərin qoyulması barədə bu cür iddialar o qədər qeyri-ciddidir ki, onlara şərh verməyə də ehtiyac yoxdur.

Vəzifəsindən asılı olmayaraq vətəndaşın ölkəyə gəlib-getməyinə niyə qadağa qoyulmalıdır ki? Azərbaycanda hətta barəsində cinayət işi açılmış şəxslərin də ölkəyə gəlişinə hər hansı məhdudiyyət yaradılmır. Belə əsassız iddialar haqqında başqa nə demək olar?”